17 noyabrdan 18-nə keçən gecə ilin yekunlarına əsasən ən yaxşı komandaların, oyunçuların və sənaye nümayəndələrinin təltif olunduğu “Esports Awards 2026” mükafatlandırma mərasimi baş tutub. Gecənin əsas qalibləri sırasında “Counter-Strike 2”, “Team Vitality” və “OpTic Texas” yer alıb.
Mərasimin əsas komanda mükafatı — “İlin kiberidman komandası” tituluna “Call of Duty League” təmsilçisi “OpTic Texas” layiq görülüb. Bu nominasiyada digər iddiaçılar “Bilibili Gaming”, “100 Thieves”, “Team Vitality” və “Team Falcons” idi. Maraqlıdır ki, “League of Legends” üzrə dünya çempionatının (“Worlds 2026”) qalibi olmasına baxmayaraq, “Bilibili Gaming” mərasimi mükafatsız tərk edib.
“İlin kiberidman klubu” mükafatını isə “Team Vitality” qazanıb. Fransız təşkilatı bu yolda digər rəqiblərlə yanaşı, “Esports World Cup” (EWC) qalibi olan “All Gamers” klubunu da qabaqlayıb. Ən yaxşı kontent yaradıcıları qrupu nominasiyasında isə “Gentle Mates” fərqlənib.
Fərdi nominasiyalar: “ZywOo”, “Puppey”, “Caedrel” və “Faker”
“İlin kiberidman siması” kateqoriyasında Mark “Caedrel” Lamont qalib gəlib, əfsanəvi Li “Faker” San Xek isə xüsusi “EWC Player’s Choice Award” mükafatına sahib çıxıb. Bununla yanaşı, “League of Legends” səhnəsindən olan digər namizədlər — “Smash”, “cvMax”, “Homme”, “Bin” və “Peyz” mükafatsız qalıblar.
Digər fərdi kateqoriyalar üzrə qaliblər aşağıdakı kimi müəyyənləşib:
- İlin sıçrayış edən oyunçusu (Breakthrough Player): Parisdə “Street Fighter” üzrə “Esports World Cup” turnirinin qalibi olmuş 15 yaşlı çilili Xayme “Craime” Bustos;
- İlin ən yaxşı məşqçisi: “PVISION”un “Dota 2” heyətinin çalışdırıcısı Klement “Puppey” İvanov;
- PC üzrə ilin ən yaxşı oyunçusu: “Team Vitality”nin CS2 ulduzu Matye “ZywOo” Erbo;
- İlin ən yaxşı kontent yaradıcısı: Nikolas “Jynxzi” Stüart. O, səsvermədə Caedrel, Korenten “Gotaga” Ussen və Tayson “TenZ” Van Nqonu geridə qoyub (xatırladaq ki, “TenZ” 2027-ci ildə “T1” heyətində VALORANT yarışlarına qayıtmağı planlaşdırır).
İlin oyunları: “Counter-Strike 2” taxtı “League of Legends”dən geri aldı
“İlin kiberidman oyunu” mükafatına ötənilki mərasimin qalibi “League of Legends”i üstələyən “Counter-Strike 2” layiq görülüb.
İlin ən yaxşı mobil kiberidman oyunu nominasiyasında isə “Mobile Legends: Bang Bang” qalib gəlib. Layihə “PUBG Mobile” və “Honor of Kings” oyunlarını qabaqlayaraq mükafat tarixində ikinci dəfə bu titula sahib çıxıb.
“Esports Awards 2026″nın əsas qalibləri
| Nominasiya | Qalib |
|---|---|
| İlin kiberidman oyunu | Counter-Strike 2 |
| İlin mobil kiberidman oyunu | Mobile Legends: Bang Bang |
| İlin kiberidman klubu | Team Vitality |
| İlin kiberidman komandası | OpTic Texas (Call of Duty League) |
| PC üzrə ilin ən yaxşı oyunçusu | Matye “ZywOo” Erbo (Team Vitality, CS2) |
| İlin ən yaxşı məşqçisi | Klement “Puppey” İvanov (PVISION, Dota 2) |
| İlin sıçrayış edən oyunçusu | Xayme “Craime” Bustos (Street Fighter) |
| İlin kiberidman siması | Mark “Caedrel” Lamont |
| EWC Player’s Choice Award | Li “Faker” San Xek |
| İlin ən yaxşı kontent yaradıcısı | Nikolas “Jynxzi” Stüart |
| Ən yaxşı kontent yaradıcıları qrupu | Gentle Mates |