“Grand Theft Auto 6” oyununun 2026-cı ilin noyabrına planlaşdırılan nəhəng relizi bir çox oyun naşirini öz planlarını yenidən gözdən keçirməyə məcbur edib. Şirkətlərin əksəriyyəti, “Rockstar Games”-in sənayedə rekordlar qırmağa hazırlaşan layihəsi ilə birbaşa rəqabətdən qaçmaq üçün öz oyunlarını sentyabr ayına və ya ümumiyyətlə 2027-ci ilə təxirə salırlar. Lakin bir layihə bu böyük meydan oxumanı qəbul etmək qərarına gəlib.
İyunun 6-da keçirilən “IGN Live” təqdimatı zamanı “Barbie Rewind” layihəsi rəsmən anons edilib. Tədbirin ən böyük sürprizi isə oyunun buraxılış tarixi olub: kolleksiya 12 noyabr 2026-cı il tarixində — “GTA 6”-nın rəsmi relizindən (19 noyabr) tam bir həftə əvvəl satışa çıxacaq. Beləliklə, noyabr ayında “GTA 6” ilə eyni vaxtda rəflərdə yer almağa cəsarət edən hələlik yeganə oyun məhz “Barbie” olub.
Retro-geyminq pərəstişkarları üçün nostalji kolleksiya
Xüsusi olaraq retro oyun həvəskarları üçün hazırlanan bu rəqəmsal toplunun tərkibinə aşağıdakılar daxildir:
- 1991-2007-ci illər arasında işıq üzü görmüş 16 fərqli “Barbie” oyunu;
- “Super NES” və “Sega Genesis” platformalarının klassik və unudulmaz taitlları;
- Əvvəllər heç bir yerdə yayımlanmamış (rəsmi çıxışı olmamış) eksklüziv bir oyun.
Sosial şəbəkələrdə virusa çevrilən “Barbenheimer” effekti
Reliz təqvimindəki bu cür cəsarətli qonşuluq xəbəri anındaca sosial şəbəkələrdə viral olub. Hər iki oyunun hədəf auditoriyası və janrları arasında yerlə göy qədər fərq olmasına baxmayaraq, geymerlər zarafatla bu iki layihəni bir-birinə qarşı qoymağa başlayıblar. İnternet məkanında artıq indidən bu qarşıdurmanı vaxtilə kino dünyasını silkələyən “Barbenheimer” fenomeninə bənzədirlər.
