Televiziya dünyasının ən nüfuzlu mükafatlarından olan “Emmi”nin idman sahəsindəki analoqu — 47-ci İdman Emmi Mükafatlarının (47th Sports Emmy Awards) təşkilatçıları müxtəlif kateqoriyalar üzrə namizədlərin adlarını açıqlayıblar.

“Kiberidman çempionatının görkəmli işıqlandırılması” (Outstanding Esports Championship Coverage) nominasiyasında qələbə uğrunda “ESL FACEIT Group” və “Riot Games” təşkilatlarının hər birindən iki layihə namizədliyini irəli sürüb. Mükafat üçün mübarizə aparacaq hadisələr bunlardır:

• 2025 Apex Legends Global Series Championship
• 2025 Call of Duty League Championship Weekend (OpTic Texas vs Vancouver Surge; ESL FACEIT Group)
• League of Legends Worlds 2025 Final (T1 Esports vs KT Rolster; LoL Esports [Riot Games])
• VALORANT Champions 2025 Grand Final (NRG vs Fnatic, Valorant Esports [Riot Games])

Qeyd edək ki, qaliblərin adları bu ilin may ayında keçiriləcək təntənəli mükafatlandırma mərasimində elan olunacaq.

Yaponiyada “Street Fighter 6” üzrə “Legacy Cup” adlı qeyri-adi onlayn turnir elan olunub. Bu yarışın əsas özəlliyi iştirakçıların yalnız 40 yaşdan yuxarı geymerlər olmasıdır.

Turnirin sponsorları iştirakçılar üçün yaş qrupuna uyğun maraqlı və faydalı hədiyyələr hazırlayıblar. Belə ki, qaliblər D vitamini əlavələri, ağız boşluğuna qulluq vasitələri və dondurulmuş hazır nahar dəstləri əldə edəcəklər. Turnirin ən dəyərli oyunçusu (MVP) üçün nəzərdə tutulan ən yaddaqalan mükafat isə tonometr (qan təzyiqini ölçən cihaz) olacaq.

Yarışa olan maraq təşkilatçıların gözləntilərini xeyli üstələyib. Belə ki, əvvəlcə turnir cəmi 128 nəfər üçün nəzərdə tutulsa da, böyük tələbat səbəbindən iştirakçı limiti əvvəlcə 256-ya, daha sonra isə 512 nəfərə qədər artırılıb.

Tədbirin təşkilatçısı Yaponiya döyüş oyunları (fighting) icmasında tanınan sima, eyni zamanda lisenziyalı həkim olan Dr. REKKA-dır. O, matçlar arasındakı fasilələrdə “tibbi şərhlər” verərək oyun anlarını sağlamlıq və fiziologiya nöqteyi-nəzərindən izah edəcək.

2026-cı il aprelin 1-dən 6-dək Böyük Britaniyanın paytaxtı London şəhəri “Red Bull Wololo: Londinium” yarışına ev sahibliyi edəcək. Turnir çərçivəsində strategiya həvəskarları “Age of Empires II: Definitive Edition” və “Age of Empires IV” oyunları üzrə qüvvələrini sınayacaqlar.

Kiberidman tarixində ilk dəfə olaraq rəsmi turnir şəhərin ikonik “Royal Albert Hall” konsert zalında baş tutacaq. Yarışın atmosferini daha da möhtəşəm etmək üçün böyük finalı 60 nəfərlik canlı orkestr müşayiət edəcək. Musiqiçilər “Age of Empires” oyununun rəsmi saundtreklərini ifa edərək izləyicilərə unudulmaz anlar yaşadacaqlar.

Təşkilatçılar bu turnir üçün xüsusi olaraq tamamilə yeni xəritələr hazırlayıblar. Bu xəritələr iştirakçıların strateji təfəkkürünü və taktiki bacarıqlarını maksimum dərəcədə sınağa çəkəcək.

Yarışın təqvimi:

• 1–3 aprel — qrup mərhələsi
• 4 aprel — dörddəbir finallar və yarımfinallar
• 5 aprel — yarımfinal qarşılaşmaları
• 6 aprel — böyük final

ESL 2027-ci ildən etibarən turnirlərinin formatında irimiqyaslı dəyişikliklər edəcəyini rəsmən açıqlayıb. Əsas yenilik bütün yarışlarda pley-off mərhələsinin 8 komandadan ibarət olması və studiya finallarından tamamilə imtina edilərək həlledici oyunların azarkeşlərlə dolu arenalarda keçirilməsidir.

Bu yeni qaydalar “IEM Krakow 2027” turniri ilə tətbiq olunmağa başlayacaq və bütün ESL səhnəsi üçün yeni standarta çevriləcək.

8 komandalı pley-off — yeni standart

2027-ci ildən etibarən bütün ESL turnirləri aşağıdakı yenilikləri əhatə edəcək:

• Pley-offda 8 komanda (indiki 6 komanda əvəzinə);
• Həlledici mərhələlərdə daha çox oyun sayı;
• “Lower bracket” (aşağı tor) finallarından və sıralama (seeding) matçlarından imtina.

Faktiki olaraq, ESL daha klassik sistemə keçid edir və beləliklə, daha çox komanda böyük səhnədə çempionluq uğrunda mübarizə aparmaq şansı qazanır.

Bütün həlledici matçlar yalnız arenada

Əsas yeniliklərdən biri də diqqətin tamamilə azarkeşlərin olduğu LAN (oflayn) formatına yönəlməsidir. İndi bütün pley-off oyunları fanatların qarşısında keçiriləcək; studiya finalları artıq keçmişdə qalır. Təşkilatçılar vurğulayıblar ki, “Counter-Strike” canlı auditoriya qarşısında daha təsirli şou və atmosfer yaradır.

“Wildcard” dəvətləri: yeni heyətlər üçün şans

Digər vacib dəyişiklik isə nüfuzlu turnirlərə “Wildcard” dəvətlərinin (xüsusi dəvətnamələrin) tətbiqidir. Məsələn, “IEM Krakow 2027″də 4 əlavə dəvət nəzərdə tutulub. Bu dəvətlər əsasən heyətində dəyişiklik (reshuffle) etmiş komandalar üçün nəzərdə tutulub. Bu addım yeni heyətlərin (roster) reytinq xalları aşağı olsa belə, top-turnirlərdə iştirak şansını itirməməsinə şərait yaradacaq.

Mükafat fondu və maliyyə sistemi

ESL kiberidman sahəsinə ciddi investisiyalar yatıracağını da təsdiqləyib:

• 2027-ci ildə 11,45 milyon dollar baza ödənişləri;
• “Grand Slam” nəzərə alınmaqla ümumilikdə 12,45 milyon dollara qədər vəsait;
• “IEM Krakow” üçün 1 250 000 dollar mükafat fondu.

Mükafatların paylanması isə “top-heavy” (qalibə daha böyük pay) prinsipində olacaq — yəni çempionlar daha yüksək məbləğlər əldə edəcəklər.

Yeni şəhərlər və qlobal genişlənmə

2027-ci ildə ESL ən azı 3 yeni şəhərdə turnir keçirməyi və 3 müxtəlif qitəni əhatə etməyi planlaşdırır. Bu, CS2-nin qlobal səviyyədə inkişafında növbəti mühüm addımdır.

Yenilənmiş ESL təqvimi

2027-ci il mövsümü yanvarın 27-dən fevralın 7-dək keçiriləcək “IEM Krakow” ilə start götürəcək. Təqvimə həmçinin aşağıdakılar daxildir:

• ESL Pro League Season 25;
• İl boyu keçiriləcək müxtəli ESL yarışları;
• Esports World Cup;
• ESL Pro League Season 26.

Qeyd edək ki, “ESL Pro League” (EPL) mövsümlərinin müddəti artıq daha qısa olacaq. ESL-in bu qərarı son illərin ən ciddi format yenilənməsidir. 8 komandalı pley-off və səhnə oyunlarına fokuslanma turnirləri daha baxımlı edəcək.