Fransa Prezidenti Emmanuel Makron videooyunlara həsr olunmuş yeni beynəlxalq festivalın yaradılacağını elan edib. O, bu barədə sentyabrın 7-də Sen-Pol-de-Vansda Fransa və Cənubi Koreya arasında mədəni və yaradıcı sənayelərə həsr olunmuş “Sommet Lumière” sammiti çərçivəsində bildirib:
“Videooyunlar mədəniyyətimizin bir hissəsi olduğu üçün biz beynəlxalq videooyun festivalı yaradacağıq.”
Mədəniyyət irsi və dövlət dəstəyi
Makronun ideyasına əsasən, yeni tədbir tərtibatçıları, oyunçuları və oyun biznesi nümayəndələrini bir araya gətirən böyük beynəlxalq platformaya çevrilməlidir. Fransa Prezidenti həmçinin videooyunların kinematoqrafiya və digər yaradıcı sahələrlə yanaşı Fransanın mədəni irsinin tamhüquqlu hissəsi kimi möhkəmlənməsini istəyir.
Fransa Mədəniyyət Nazirliyi artıq videooyunları ayrı bir incəsənət növü kimi qiymətləndirir. Makron qeyd edib ki, videooyunlar ənənəvi olaraq kino, musiqi və televiziyanı əhatə edən “Fransa mədəni müstəsnalığı” (French cultural exception) sisteminin tərkib hissəsinə çevrilməlidir. Bu, həm də ölkənin ümumi inkişaf strategiyasına uyğundur — belə ki, bu il Fransa “Cannes Lions” festivalında “Creative Country of the Year 2026” titulu qazanıb.
Tarix, format və gələcək gözləntilər
Hələlik festivalın dəqiq tarixi, keçiriləcəyi yer və formatı elan olunmayıb. Fransanın bəzi KİV-ləri ilk tədbirin 2027-ci ildə baş tuta biləcəyini bildirsələr də, rəsmi təsdiq yoxdur. Tədbirin klassik sərgimi, mədəniyyət festivalı, yoxsa biznes konfransı olacağı da hələlik bəlli deyil.
Bununla belə, Makronun iddiaları aydın görünür: Fransa “Gamescom” və ya “Summer Game Fest” səviyyəsində qlobal bir festival yaradaraq dünya qeymdev (game dev) səhnəsindəki mərkəzi mövqeyini daha da möhkəmləndirmək niyyətindədir.
