Londonda Böyük Britaniyanın əsas kiberidman mərkəzinə çevrilməsi planlaşdırılan, 25 000 yerlik London Colosseum adlı çoxfunksiyalı yeni arenanın iddialı layihəsi təqdim olunub.
Obyektin “Queen Elizabeth Olympic Park” ərazisində inşa edilməsi nəzərdə tutulur. Layihə “Jericho Estates”, “Peacock Gym” və “Torch Sports” şirkətləri tərəfindən həyata keçirilir. Əsas məqsəd Londonu kiberidman sahəsində Yaxın Şərq və Asiya arenaları ilə rəqabət apara biləcək qlobal mərkəzlərdən birinə çevirməkdir.
Mətbuat üçün açıqlamada arenanın xüsusi olaraq böyük beynəlxalq turnirlər üçün adaptasiya edildiyi vurğulanır:
“25 000 yerlik arena ən böyük beynəlxalq turnirlərin finallarını keçirmək üçün nəzərdə tutulub. Bu layihə Londonun oyun paytaxtı kimi artan nüfuzunu Yaxın və Uzaq Şərqdəki kiberidman bazarının sürətli yüksəlişi ilə birləşdirəcək”.
Əsas arenadan əlavə, layihəyə kiberidmanın inkişafı üçün nəzərdə tutulmuş ayrıca şəhərcik — London Colosseum Academy də daxildir. Orada aşağıdakı şərait yaradılacaq:
- Hər biri 3 000 yerlik olan iki kiçik arena;
- Peşəkar oyunçular üçün təlim mərkəzi;
- Təhsil və tədqiqat proqramları.
Bu infrastruktur britaniyalı kiberidmançıların beynəlxalq səhnəyə hazırlanması üçün tamhüquqlu sistem yaratmağa imkan verəcək. Memar Ondrjey Xıbik qeyd edib ki, layihənin əsas özəlliyi məkanın çevikliyi olacaq:
“Arena asanlıqla transformasiya olunacaq şəkildə layihələndirilib – burada həm yığcam kiberidman səhnəsi, həm də dünya finalları üçün 25 000 tamaşaçı tutumlu nəhəng konfiqurasiya qurmaq mümkündür”.
Kompleksdə həmçinin otel, yaşayış mənzilləri və ictimai məkanların yer aldığı çoxfunksiyalı qüllə də nəzərdə tutulub. Bu isə ərazinin təkcə turnirlər zamanı deyil, hər zaman aktiv olmasını təmin edəcək. Londonda keçirilən BLAST Premier və DreamHack 2026 kimi tədbirlərin fonunda bu yeni arena şəhərin infrastrukturunu tamamilə yeni səviyyəyə qaldıracaq.
