“Love” jurnalına müsahibə verən “Rockstar Games“in ssenaristi Aleksa D’Aqostino “GTA 6” personajlarının hekayəsi yaradılarkən Lusiyaya böyük diqqət ayrıldığını bildirib. Tərtibatçıların fikrincə, o, studiyanın “GTA 4″dəki Niko Bellik və “Red Dead Redemption 2″dəki Artur Morqan kimi ikonik protaqonistləri ilə eyni səviyyədə dayanmaq potensialına malikdir.
Lusiya Kaminos “GTA 6″nın iki əsas qəhrəmanından biri olacaq. İdeyaya əsasən, o, immiqrant köklərə malikdir və Nyu-Cersi ştatının Nyuark şəhəri yaxınlığında böyüyüb, daha sonra isə taleyi onu Leonidaya gətirib çıxarıb. Lusiya daha yaxşı həyata atılmaq üçün mübarizə aparır və bu yolda qarşısına çıxan heç bir maneəyə təslim olmaq niyyətində deyil.
Ceysona gəldikdə isə, “Rockstar”ın bildirdiyinə görə, onun hekayəsi keçmiş hərbi xidməti ilə bağlı hər hansı siyasi mesaj vermək məqsədi daşımır. Yaradıcılar qeyd ediblər ki, şərait onu tədricən narkotik ticarətinə və bank qarətlərinə sövq edir, lakin bəzi kritik qərarlar doğrudan da oyunçunun seçimlərindən asılı olacaq.
“Rockstar” Ceyson və Lusiyanı qəsdən fərqli, lakin bir-birini tamamlayan iki obraz kimi formalaşdırıb. “GTA 6” oyununun rəsmi relizi 19 noyabr 2026-cı il tarixində “PlayStation 5” və “Xbox Series X/S” konsollarında baş tutacaq.
