“Ninjas in Pyjamas” (NIP) 10 gün ərzində üst-üstə iki turnirdə qələbə qazanaraq “Valve” reytinqində mövqeyini kəskin şəkildə yaxşılaşdırıb və Meycor (Major) yarışına vəsiqə qazanmaq şansını təxminən beş dəfə artırıb.
Əvvəlcə “1w Private Club Season 1” turnirinin çempionu olan NIP, artıq oktyabrın 3-də “ROG JOURNEY Autumn 2026” yarışında da zəfər qazanaraq kuboku başı üzərinə qaldırıb.
Reytinqdə kəskin yüksəliş və Meycor perspektivləri
Bu qısa müddət ərzində İsveç təşkilatı 270-ə yaxın VRS xalı toplayaraq “Valve” reytinqində ciddi irəliləyişə nail olub. “ROG JOURNEY” turnirindəki qələbədən sonra komanda aktivinə daha 82 xal yazdıraraq eyni vaxtda 11 pillə irəliləyib və 18-ci sıraya qalxıb.
Reytinq mövqeyi ilə yanaşı, NIP-in Meycor turnirinə dəvət almaq şansları da əhəmiyyətli dərəcədə artıb. “HLTV” portalının aktual simulyasiyasına əsasən, son zəfərdən sonra komandanın dəvət almaq ehtimalı 62.5%-ə çatıb ki, bu da onları birbaşa dəvət zonasına daha da yaxınlaşdırıb.
İki turnirdəki uğurlu çıxış NIP-ə həm də 23 000 dollar pul mükafatı gətirib — 13 000 dollar “1w Private Club Season 1” qələbəsinə, 10 000 dollar isə “ROG JOURNEY Autumn” çempionluğuna görə əldə olunub.
