DICE bir neçə studiya ilə əməkdaşlıq çərçivəsində yeni Battlefield oyununun aktiv inkişafını davam etdirir. Hazırda Battlefield Labs proqramı çərçivəsində çoxnəfərlik rejim üçün qapalı testlər keçirilir. Bu arada internetdə süjet kampaniyasına dair yeni məlumatlar yayılıb. Kampaniyanın hələ tam hazır olmadığı bildirilsə də, datamaynerlər oyun fayllarında bir süjet tapşırığına dair istinadlar aşkar ediblər.

Həmin tapşırıq Cəbəllütariqdə cərəyan edir — burada Pax Armata adlı koalisiya qüvvələri hücuma keçib. Oyunçu NATO və Böyük Britaniya komandanlığı altında fəaliyyət göstərən Dagger 1–3 bölməsinin tərkibində yer alacaq. Missiyada həmçinin Böyük Britaniyanın xüsusi təyinatlı Lancer qrupu da iştirak edir. Tapşırıq sahilə çıxmaq, minaları təmizləmək və AAV7 texnikasının çıxışı üçün sahəni hazırlamaqla başlayır. Daha sonra oyunçu Cəbəllütariqin Böyük Mühasirə dövründən qalan tunelləri ilə irəliləyərək, sonda düşmənin HHM sistemini məhv etməlidir ki, hava qüvvələrinin yolu açılsın.

Daha əvvəl bildirilmişdi ki, süjet kampaniyasının hazırlanması çətinliklərlə üzləşib — ilkin versiyası tamamilə ləğv olunub və layihənin rəhbərliyi bir neçə dəfə studiyalar arasında dəyişib. Bu səbəbdən kampaniya ümumi inkişaf qrafikindən geri qalır. İlkin məlumatlara əsasən, kampaniyanın müddəti təxminən altı saat olacaq ki, bu da müasir oyunlar üçün standart göstəricidir.

Şayiələrə görə, Battlefield 6-nın büdcəsi hələ 2023-cü ildə 400 milyon dollar səviyyəsində qiymətləndirilirdi və bu vaxtdan bəri xərclər daha da artıb. Electronic Arts bu dəfə oyunun 100 milyon oyunçunu cəlb edəcəyinə ümid edir — buna Warzone bənzəri rejim və Gauntlet adlı yeni formatda şərti pulsuz iki rejim kömək etməlidir. Lakin tərtibatçılar bu gözləntilərdən narahatdırlar, çünki əvvəlki hissələr bu qədər geniş auditoriyaya çatmamışdı.

Red Dead Online yenidən diqqət mərkəzində – yeni tapşırıqlar, hadisələr və ehtimal olunan davamı

Üç illik fasilədən sonra Rockstar Games gözlənilmədən Red Dead Online üçün böyük bir yeniləmə yayımladı. “Strange Tales of the West” adlı bu yeniləmə 1 iyul tarixində təqdim olunub və oyuna mistik tapşırıqlar, müvəqqəti tədbirlər və oyunun mümkün davamına dair ipucları gətirib.

Əsas yeniliklərdən biri – dörd yeni teleqram tapşırığı oldu. Bu tapşırıqları oyunçular məşhur yazıçı Teodor Levindən alırlar. Levin Vəhşi Qərbdə baş verən qəribə hadisələri araşdırır. Tapşırıqlardan birində oyunçular zombilərlə dolu Armadillo şəhərinə yollanırlar – bu isə birbaşa Red Dead Redemption oyununun Undead Nightmare əlavəsinə istinaddır.

Yeniləmə ilə yanaşı, oyunda xüsusi müvəqqəti tədbir də başlayıb. Bu tədbir çərçivəsində unikal sınaqlar və mükafatlar təqdim olunur. Bütün yeni məzmun tamamilə pulsuzdur və artıq oyunçular üçün əlçatandır.

Rockstar tərəfindən təqdim olunan rəsmi materiallarda yeniləmənin adı “Strange Tales of the West: Volume 1” kimi qeyd olunub. Bu isə yeniləmənin davamı olacaq hissələrinin planlaşdırıldığını göstərir.