“Overwatch World Cup 2026” dünya çempionatının böyük finalında Cənubi Koreya milli komandası Səudiyyə Ərəbistanı yığmasına 2:1 hesabı ilə qalib gələrək kuboku başı üzərinə qaldırıb. Turnirin həlledici pley-off mərhələsi sentyabrın 12–13-də Kaliforniya ştatının Anahaym şəhərində keçirilən “BlizzCon 2026” sərgisi çərçivəsində baş tutub.
Yarış avqustun 19-dan 23-dək Cənubi Koreyanın Busan şəhərində keçirilən qrup mərhələsi ilə başlayıb. Turnirdə 4 qrupa bölünmüş 16 milli komanda iştirak edib. Qrup oyunlarının yekunlarına əsasən, ən yaxşı iki kollektiv — Səudiyyə Ərəbistanı, İspaniya, Almaniya, İsveç, ABŞ, Cənubi Koreya, Fransa və Avstraliya — pley-offa yüksəlib.
- 1/4 final (12 sentyabr): Səudiyyə Ərəbistanı İspaniyanı (3:1), İsveç Almaniyanı (3:0), Cənubi Koreya ABŞ-ı (3:0), Fransa isə Avstraliyanı (3:0) üstələyib.
- Yarımfinal (13 sentyabr): Səudiyyə Ərəbistanı İsveçə şans verməyib (3:0), Cənubi Koreya isə gərgin matçda Fransadan üstün olub (3:2).
- 3-cü yer uğrunda matç və Böyük Final: Fransa İsveçə 3:1 hesabı ilə qalib gələrək bürünc medala sahib çıxıb, böyük finalda isə koreyalılar 2:1 hesablı zəfər qazanıblar.
Tarixi 4-cü titul və mükafat fondu
“Overwatch World Cup 2026″nın dəqiq mükafat fondu açıqlanmasa da, milli komandalara xüsusi oyundaxili kraydfandinq (crowdfunding) dəstlərinin satışından əldə olunan gəlir hesabına maliyyə dəstəyi göstəriləcək.
Bu zəfər Cənubi Koreya üçün turnir tarixində dördüncü titul olub — ölkə daha əvvəl 2016, 2017 və 2018-ci illərdə də çempionluq yaşayıb. Əvvəlki illərdə trofeyi qazanan digər komandalar isə ABŞ (2019) və Səudiyyə Ərəbistanı (2023) olub.
