Çinin PUBG səhnəsində keçirilən PCL finalları zamanı “17Gaming” və “PeRo” komandaları arasında ciddi münaqişə yaranıb. Əvvəlcə qarşılıqlı “çiterlik” (hiyləgərlik) ittihamları və toksik bəyanatlarla başlayan gərginlik, artıq hüquqi müstəviyə keçib. “17Gaming” təşkilatı “PeRo”nun menecerinə qarşı rəsmi vəkil iddiası qaldırıb.
İddiaya görə, “PeRo” meneceri “Weibo” sosial şəbəkəsində saxta hesabdan istifadə edərək “17Gaming” təşkilatının qadın nümayəndəsinin ünvanına təhqiramiz və nalayiq şərhlər yazıb. Məhkəmə sənədlərində qeyd olunan konkret vulqar ifadələrin həm həmin xanımın, həm də bütövlükdə təşkilatın nüfuzuna ciddi xələl gətirdiyi bildirilir.
Sosial şəbəkə istifadəçisi “pattrick_36” vəkil məktubunun skrinşotlarını və münaqişəyə dair digər materialları ictimaiyyətə təqdim edib. Hazırda Çin kiberidman ictimaiyyəti bu görünməmiş məhkəmə çəkişməsinin nəticəsini gözləyir.
