Stokholmda keçirilən CS2 üzrə “Stake Pulse Beat II” turnirinin həlledici qarşılaşmasında “HEROIC” kollektivi “100 Thieves”ə 2:1 hesabı ilə qalib gələrək çempionluq tituluna yiyələnib.
İlk Dust2 xəritəsi gərgin mübarizə şəraitində keçib. “HEROIC” müdafiədə inamlı başlasa da, “100 Thieves” hücumda 7 raund götürməyi bacarıb. İkinci hissədə isə rəqib ardıcıl 6 raundluq uğurlu seriya ilə təşəbbüsü tamamilə ələ alaraq xəritəni qələbə ilə başa vurub.
İkinci xəritə olan Ancientdə oxşar ssenari baş versə də, bu dəfə nəticə “HEROIC”in xeyrinə olub. “100 Thieves” 5:7 hesablı geriləmədən sonra hücum tərəfində ardıcıl altı raund qazanaraq ilk olaraq matç-pointə çatıb. Lakin “HEROIC” xarakter nümayiş etdirərək hesabı bərabərləşdirib və ikiqat overtaymda qələbəni qoparıb.
Həlledici Inferno xəritəsi Kristoffer Storqardın yetirmələrinin tam nəzarəti altında keçib. “HEROIC” 11:0 hesablı darmadağınla start götürüb, seriyaya son nöqtəni isə Linus Berqman və Antonio Martinesin 2v3 klattçı qoyaraq yekun 13:4 hesabını rəsmiləşdirib.
Reytinq dəyişiklikləri və Meycor şansları
“HEROIC” üçün bu kubok heyətin yayda Lyudviq Brolin və Antonio Martines ilə gücləndirilməsindən sonra qazanılan ikinci LAN-titulu olub. Stokholmdakı uğur sayəsində kollektiv birbaşa 10 pillə irəliləyərək dünya reytinqində 17-ci, Avropada isə 13-cü yeri tutub.
Məğlubiyyətə baxmayaraq, “100 Thieves” də turniri öz aktivinə yaza bilər. Qazanılan 127 xal onlara VRS qlobal reytinqində 14 pillə irəliləyərək 27-ci sıraya qalxmağa imkan verib. Bu isə üç vacib LAN-turnir ərəfəsində komandanın Meycora düşmək şanslarını qoruyub saxlayır.
