NAVI-nin kapitanı Aleksi “Aleksib” Virolaynen HLTV.org-a verdiyi müsahibədə “Legacy”yə məğlubiyyətdən sonra komandanın “Esports World Cup 2026” turnirindən kənarlaşmasını şərh edib. Fin kiberidmançı NAVI-nin hər iki xəritədə fəlakətli başlangıç etdiyini etiraf edib.
Uğursuz start və “n1ssim” amili
“Legacy” hər iki xəritədə 10:2 hesabı ilə önə keçərək seriyaya dərhal nəzarəti ələ alıb. Aleksinin sözlərinə görə, zəif başlangıç məğlubiyyətin əsas səbəbi olub:
“Biz sadəcə çox ləng başladıq. Sonra hücum (T) tərəfində temp toplamağı bacarsaq da, ‘Legacy’ artıq çox sayda raund qazanmışdı. Bir neçə kritik səhvə yol verdik və kambeki tamamlaya bilmədik.”
“Inferno”da NAVI bir neçə dəfə rəqibin planlarını doğru təxmin etsə də, bunu raund qələbələrinə çevirə bilməyib. Hətta ilk silahlı raundda B nöqtəsinə üç oyunçu yerləşdirilsə də, raund uduzulub.
Eyni ssenari ikinci xəritə “Ancient”də də təkrarlanıb. Aleksib Vinisius “n1ssim” Pereyranı fərdi baxımdan məğlubiyyətin əsas səbəbkarlarından biri kimi göstərib:
“‘n1ssim’ ‘Ancient’ xəritəsində əla oynayaraq yerimizi göstərdi. Oyunun axarını dəyişə biləcəyimiz vacib silahlı raundlarda onu dəyişə (trade) bilmədik. Hələlik sadəcə onların daha yaxşı oynadıqlarını düşünürəm, biz isə kuboklar uğrunda mübarizə apara biləcək NAVI deyildik.”
Bərpa olunmaq üçün vaxt azlığı və gələcək planlar
Məğlubiyyət komandaya dincəlmək üçün çox vaxt verməyəcək. Növbəti turnir olan “BLAST Open Porto” bir həftədən də az vaxt ərzində başlayacaq. Kapitanın sözlərinə görə, NAVI EWC-də olduğu müddətdə hər gün intensiv məşq edib:
“Buralarda olduğumuz hər gün formada qalmaq və bütün xəritələrimizi təkmilləşdirmək üçün məşq edirdik. Bu nəticə gözlədiyimiz kimi olmadı və biz bundan razı deyilik. Lakin qarşıda hələ bir neçə turnirimiz var və növbətisi artıq çox yaxındır. Özümüzü toparlamalı və daha yaxşı oynamalıyıq.”
Aleksib həmçinin ilk raundlara yanaşmanı ciddi şəkildə yaxşılaşdırmağın vacibliyini vurğulayıb:
“Bu gün hər iki xəritədə ləng başladıq. Belə rəqiblərə qarşı bu şəkildə qələbə qazanmaq praktiki olaraq qeyri-mümkündür. Biz ikiqat daha yaxşı, ikiqat daha yaxşı hazırlaşmalı, inanmağa və işləməyə davam etməliyik.”
NAVI pley-offun ilk raundunda “Legacy”yə məğlub olduqdan sonra “Esports World Cup 2026” turnirini 9–16-cı yerlərdə başa vurub.
