“Google” proqramlaşdırma bilikləri tələb etmədən mətn sorğuları (prompts) vasitəsilə oyunlar yaratmağa imkan verən eksperimental “Playground” platformasını istifadəyə verib.
İstifadəçi istədiyi oyunu adi mətnlə təsvir edə bilər, bundan sonra “Playground” onun prototipini hazırlayır. Daha sonra elə həmin çat vasitəsilə oyunun fizikasını, qaydalarını, personajlarını və ya ətraf mühitini dəyişmək mümkündür.
Hazır layihələri məxfi saxlamaq, keçid linki vasitəsilə dostlara göndərmək və ya “Playground”ın ümumi qalereyasında dərc etmək olar. Platforma PC və smartfon brauzerlərində işləyir, ayrı-ayrı janrlar isə çoxistifadəçili (multiplayer) rejimi və liderlər cədvəlini dəstəkləyir.
“Unity Spark” inteqrasiyası və əlçatanlıq
“Google” həmçinin oyunların yaradılması üçün daha təkmil alət olan “Unity Spark” ilə inteqrasiyanı anons edib. Bu alət 3D qrafika ilə işləməyə, “Unity” mühərrikinin imkanlarından istifadə etməyə və mətn sorğuları vasitəsilə daha mürəkkəb layihələr ərsəyə gətirməyə imkan verəcək.
“Unity Spark” hazırda sınaq mərhələsindədir və qapalı beta-testin daha sonra başlaması planlaşdırılır. “Google” bu iki alətin sintezini sadə mətn təsvirindən başlayıb ideyanı tədricən tamfunksional oyuna çevirmək fürsəti kimi dəyərləndirir.
“Playground” artıq ABŞ-da 18 yaşdan yuxarı istifadəçilər üçün istifadəyə verilib. Oyun yaratmaq funksiyasına giriş “Google AI” abunəliyi əsasında paylanacaq.
