Kiberidmanda Dürüstlük Komissiyası (ESIC) peşəkar “Dota 2” oyunçusu Tommi “Taiga” Le barəsində apardığı araşdırmanı yekunlaşdıraraq onun kiberidmandan ömürlük kənarlaşdırılması barədə qəti qərarını açıqlayıb. Oyunçu proses boyu komissiya ilə əməkdaşlıqdan imtina edib.
Araşdırma nəticəsində məlum olub ki, “Taiga” ESIC-in Davranış Məcəlləsini dəfələrlə pozub. İstintaq oyunçunun aşağıdakı əməlləri törətdiyini sübuta yetirib:
- Mərc oyunlarında və ya danışılmış matçlarda şübhəli bilinən şəxslərlə mütəmadi ünsiyyətdə olub;
- Peşəkar qarşılaşmalarla bağlı mərc müzakirələrində və bu sahəyə aid maliyyə əməliyyatlarında iştirak edib;
- Mərc məqsədilə insayder məlumatlarını (ictimaiyyətə açıqlanmayan daxili məlumatlar) sızdırıb və ya onlardan istifadə edib;
- Mərcdən qazanc əldə etmək üçün oyunun müəyyən epizodlarını qabaqcadan planlaşdırıb (spot-fixing);
- Bu qeyri-qanuni fəaliyyətlərdən maliyyə mənfəəti əldə edib;
- Ona gələn şübhəli təkliflər barədə müvafiq qurumlara məlumat verməyib və ESIC-in araşdırmasına kömək etməyib.
Bu faktlara əsaslanaraq, ESIC “Taiga”nın həm Antikorrupsiya Məcəlləsini, həm də Davranış Məcəlləsini kobud şəkildə pozduğu qənaətinə gəlib.
Pozuntuların ağırlığını və oyunçunun istintaqla əməkdaşlıq etməməsini nəzərə alan komissiya, ona ömürlük diskvalifikasiya cəzası verib. Tommi Le-yə ESIC üzvü olan turnir operatorlarının keçirdiyi heç bir yarışda iştirak etməyə icazə verilməyəcək. Qərar elan edildiyi andan qüvvəyə minir.
Bu qərar Antikorrupsiya Məcəlləsinin (ACC) 4.6.7-ci maddəsinə uyğun olaraq, mövcud sübutların günahın sübuta yetirilməsi üçün kifayət qədər olması əsasında qəbul edilib.
