Yapon oyun sənayesinin nəhəngləri arasında yer alan “Sega” öz strateji fəaliyyətində köklü dəyişikliklər etdiyini açıqlayıb. Şirkətin son maliyyə hesabatında genişmiqyaslı “Super game” təşəbbüsü üzərində işlərin dayandırıldığı rəsmən təsdiqlənib.

“Super game” layihəsi ilk dəfə 2021-ci ildə “Sega”nın çoxillik təcrübəsini və texnoloji nailiyyətlərini birləşdirən bir neçə iddialı AAA oyununun yaradılması planı kimi təqdim olunmuşdu. O vaxt şirkət bu istiqamətə təxminən 882 milyon dollar investisiya yatırmağı planlaşdırırdı və “oyun sənayesinin sərhədlərini aşacaq” bir məhsul vəd edirdi. İndi isə “Sega” rəsmən bu təşəbbüsdən imtina edib, lakin layihəyə indiyədək nə qədər vəsait xərcləndiyi açıqlanmır.

Eyni zamanda, “Sega” pulsuz oyunlar modelinə (“free-to-play”) olan münasibətinə də yenidən baxıb. Əvvəllər şirkət bu modelin tanınmış franşizalara yeni auditoriya cəlb edəcəyini gözləyirdi, lakin “Sonic Rumble Party” və digər bənzər buraxılışların nəticələri gözləniləndən xeyli zəif oldu. Bu səbəbdən “Sega” tədricən bu istiqamətdən uzaqlaşmaq qərarına gəlib. Artıq “free-to-play” layihələri ilə məşğul olan 100-dən çox əməkdaş digər komandalara keçirilib.

Buna baxmayaraq, hesabatda 2023-cü ildə elan edilmiş “Yeni Era” proqramının inkişaf etdirildiyi vurğulanır. Bu təşəbbüs çərçivəsində “Sega” klassik franşizalarını — Jet Set Radio, Streets of Rage, Shinobi, Golden Axe və Crazy Taxi oyunlarını geri qaytarmağı planlaşdırır. Bu oyunlar haqqında hələlik ətraflı məlumat verilmir.

Bundan əlavə, şirkət bu yaxınlarda ilk tizeri təqdim olunan “Alien: Isolation” qorxu oyununun davamı barədə də təfərrüatları açıqlamağa hələ hazır olmadığını bildirib.

“GTA VI” üçün ilkin sifarişlərin (pre-order) artıq 18 may 2026-cı il tarixində başlayacağı ehtimal edilir. Bu məlumat “Best Buy” tərəfdaşlıq proqramının iştirakçılarına göndərilən bildirişdə üzə çıxıb.

Məlumata görə, ilkin sifarişlərin başlanmasına həsr olunmuş promo-kampaniya 18-21 may tarixlərini əhatə edəcək. Hələlik “Rockstar” tərəfindən rəsmi təsdiq gəlməsə də, bu tarixlər kifayət qədər məntiqli görünür.

Belə ki, mayın 21-də “Take-Two” şirkəti növbəti maliyyə hesabatını dərc edəcək. Naşir şirkət əvvəllər də dəfələrlə öz oyunları ilə bağlı vacib xəbərləri məhz hesabat dövrləri ərəfəsində paylaşıb. Buna görə də ilkin sifarişlərin məhz bu aralıqda start götürməsi böyük marketinq strategiyasının bir hissəsi kimi qiymətləndirilir.

Oyunun rəsmi çıxışı 19 noyabr 2026-cı il tarixinə planlaşdırılır. Oyun ilk olaraq aşağıdakı platformalarda əlçatan olacaq:

• PlayStation 5
• Xbox Series X/S

PC versiyasının isə 2027-ci ilin əvvəlində işıq üzü görəcəyi gözlənilir.

Franşizanın ən sirli və qaranlıq hissəsi hesab olunan “Assassin’s Creed Hexe” barədə yeni detallar sızmaqda davam edir. Tanınmış insayder j0nathan-ın baş qəhrəman Anikanın Esionun bacısı Klaudiya Auditorun nəslindən olması barədə açıqlamasından sonra, o, oyundan ilk kadrı da paylaşıb.

Görüntüdə Anikanı klassik assasin geyimində görmək mümkündür. Onun ağac budağının üzərində dayanması oyunda ağaclarla hərəkət sisteminin yenilənmiş versiyasının olacağına işarə edir. İnsayderin sözlərinə görə, qəhrəmanın bir neçə geyim variantı olacaq ki, bunların arasında “cadugər” üslubunda kostyumlar da yer alacaq.

İnsayder qeyd edib ki, orijinal kadr həddindən artıq qaranlıq olduğu üçün o, neyron şəbəkə vasitəsilə redaktə edilib. Bu səbəbdən oyunun final versiyasında səhnənin görüntüsü bir qədər fərqli ola bilər.

Süjetlə bağlı yeni təfərrüatlar da bəlli olub. Oyunda Volfqanq adlı assasin peyda olacaq ki, o, “mənəvi cəhətdən ziddiyyətli” bir personaj kimi təsvir edilir. O, Anika üçün bir növ “pis polis”, oyunda görünəcəyi iddia edilən Esio isə “yaxşı polis” rolunu oynayacaq. Ehtimal olunur ki, oyunçunun qərarları Anikanın kimə daha çox qulaq asacağına və dolayısı ilə hekayənin sonuna təsir edəcək.

“Assassin’s Creed Hexe”nin əsas məkanı Vürtsburq şəhəri olacaq, lakin oyunçulara digər regionlar da göstəriləcək. Tərtibatçılar tutqun atmosferə, qaranlıq meşələrə, rituallara, gizlilik (stealth) elementlərinə və cadugər ovu mövzusuna xüsusi önəm verirlər. Süjetə görə, Anika cadugərlikdə şübhəli bilinərək təqib olunacaq.

Müxtəlif mənbələrin fikrincə, “Hexe” bütün seriyanın ən qaranlıq oyunu ola bilər. Oyunun çıxışı 2027-ci ildən tez gözlənilmir.

“Sony” şirkəti may ayında PlayStation Plus kataloquna əlavə ediləcək yeni oyunların siyahısını açıqlayıb. Ayın ən diqqətçəkən yenilikləri arasında Star Wars Outlaws və bir müddət əvvəl kitabxanadan çıxarılan, lakin indi yenidən geri dönən Red Dead Redemption 2 yer alır.

Bu ay kataloqa ümumilikdə səkkiz oyun əlavə olunacaq. Onlardan yeddisi “PlayStation Plus Extra” və “Premium” abunəçiləri üçün əlçatan olacaq.

Kitabxanaya daxil olan digər oyunlar:

• Bramble: The Mountain King
• The Thaumaturge
• Flintlock: The Siege of Dawn
• Broken Sword – Shadows of the Templar: Reforged
• Enotria: The Last Song

“PlayStation Plus Premium” abunəçiləri üçün isə eksklüziv olaraq klassik arkada şuteri olan Time Crisis əlavə ediləcək.

Bütün bu yeniliklər 19 may tarixindən etibarən aktivləşəcək. Həmçinin “Sony” xatırladıb ki, istifadəçilər hələ də ayın pulsuz oyunlarını — EA Sports FC 26, Nine Sols və Wuchang: Fallen Features layihələrini öz kitabxanalarına əlavə edə bilərlər.

“Bethesda Softworks” nəşriyyatı “Nintendo Switch 2” kitabxanasını zənginləşdirməyə davam edir. Şirkət populyar macəra-ekşn janrındakı “Indiana Jones and the Great Circle” oyununu yeni nəsil portativ konsol üçün istifadəyə verib.

Xatırladaq ki, oyun ilk dəfə 2024-cü ilin dekabrında debüt etmiş, 2025-ci ildə isə “PlayStation 5” platformasına gəlmişdi. İndi isə əfsanəvi arxeoloqun macəralarına “Switch 2” sahibləri də qoşula biləcəklər.

Buraxılış münasibətilə tərtibatçılar yeni treyler təqdim ediblər. Oyunu artıq bitirənlər üçün burada yeni nəsə olmasa da, yeni başlayanlar üçün süjet bir daha xatırladılır: İndiana Cons dünyanın müxtəlif nöqtələrində yerləşən sirli tikililər kompleksinin — “Böyük Çevrə”nin (Great Circle) sirrini açmağa çalışır.

Oyunçuları qarşıda müxtəlif tapmacalar, qədim məqbərələrin tədqiqi, faşist və nasistlərlə döyüşlər, həmçinin franşizaya xas olan yumor və kinematoqrafik atmosfer gözləyir.

Texniki göstəricilərə gəldikdə, layihə “Switch 2” konsolunda stabil 30 FPS sürəti ilə işləyir. Bəzi bloqerlərin fikrincə, oyunun müəyyən vizual məqamları hətta “Xbox Series S” versiyasından daha yaxşı görünür.

“Indiana Jones and the Great Circle” oyununu “Switch 2” üçün həm rəqəmsal formatda, həm də fiziki kartriclərdə əldə etmək olar. Qeyd edək ki, oyunun bütün məlumatları daşıyıcıya yazılıb, buna görə də əlavə yükləmələrə ehtiyac yoxdur.