Yaxın Şərqdə baş verən müharibə səbəbindən “Esports Foundation” təşkilatının Esports World Cup 2026 turnirini Ər-Riyaddan (Səudiyyə Ərəbistanı) Parisə (Fransa) köçürmək qərarından sonra yeni təfərrüatlar məlum olub.

“Esports Foundation” turnirin yüksək səviyyədə təşkili və keçirilməsi üçün təxminən 250 milyon avro (€250 milyon) investisiya yatıracaq. Bu barədə “Sheep Esports” portalı Fransa Prezidenti Administrasiyasının rəsmi bəyanatına istinadən məlumat yayıb. EWC 2026 turniri iyulun 6-dan avqustun 23-dək baş tutacaq.

İnvestisiya hansı xərcləri əhatə edəcək?

Ayrılan irimiqyaslı vəsait turnirin uğurla reallaşdırılması üçün aşağıdakı əsas istiqamətlərə yönəldiləcək:

• İnfrastruktur və texniki istehsalat (production);
• İştirakçıların yerləşdirilməsi və nəqliyyat təminatı;
• Qlobal canlı yayımların təşkili;
• Təntənəli açılış və bağlanış mərasimləri;
• Azarkeşlər üçün xüsusi fan-aktivliklər.

Fransa iqtisadiyyatına milyonlarla avro gəlir

Fransa üçün belə bir möhtəşəm kibersport bayramına ev sahibliyi etmək güclü iqtisadi təkan rolunu oynayacaq.

Fransa rəsmilərinin proqnozu: Yerli hakimiyyət orqanlarının ilkin hesablamalarına görə, “Esports World Cup” turnirinin keçirilməsi ölkə iqtisadiyyatına təxminən 600 milyon avro (€600 milyon) dəyərində dolayı iqtisadi mənfəət qazandıracaq.

CS2 üzrə “Parken Challenger Championship” turnirlər seriyasının təşkilatçısı olan “New Breed Agency ApS” şirkəti rəsmən müflisləşmə prosesinə başladığını elan edib. Müvafiq məlumat turnir operatorunun rəsmi sosial şəbəkə hesablarında yayımlanıb.

Şirkətin rəsmi bəyanatında qeyd olunur ki, son bir neçə ay ərzində rəhbərlik əlavə maliyyə vəsaitlərinin cəlb edilməsi və alternativ çıxış yollarının tapılması istiqamətində intensiv iş aparıb. Lakin bütün cəhdlərə baxmayaraq, problemi həll edəcək uğurlu bir nəticə əldə olunmayıb. Mövcud vəziyyətlə əlaqədar olaraq fəaliyyətini davam etdirə və gələcək öhdəliklərini yerinə yetirə bilмяyən şirkət, məcburi şəkildə müflisləşmə proseduruna start verməli olub.

Turnirlər ləğv edildi, borclar yığılıb qaldı

Yaranmış maliyyə böhranı səbəbindən seriyanın planlaşdırılan 9-16-cı turnirləri, eləcə də mövsümün həlledici final mərhələsi olan “Parken Stadium Master Finals” rəsmən ləğv edilib.

Bununla yanaşı, təşkilatçıların keçmiş çempionatlarda iştirak etmiş bir sıra komandaların qazandıqları mükafat pullarını hələ də ödəmədiyi məlum olub.

Mükafatlar və təzminatlar necə ödəniləcək? Ödənilməmiş mükafat fondları, təzminat tələbləri və yığılıb qalmış digər borclarla bağlı bütün məsələlər müflisləşmə haqqında qanunvericiliyə uyğun olaraq, təyin ediləcək iflas idarəçisinin nəzarətinə veriləcək. Bu xoşagəlməz maliyyə krizisindən zərər çəkənlər arasında komandalar, oyunçular, biznes tərəfdaşları və turnirin texniki heyəti var.

CS2 turnirlərinin təşkilatçısı “Digital Crusade” özünün məşhur “DraculaN” yarışının yeddinci mövsümünü elan edib. Turnir bu dəfə rəsmi olaraq “Super DraculaN” adını alıb. Çempionatda iştirak edəcək 16 komanda 150 000 dollarlıq ($150 000) mükafat fondu və “VRS” reytinqində çəkisi olan xallar uğrunda mübarizə aparacaq.

Meycordan dərhal sonra: Oyunların vaxtı və məkanı

Turnirin iyunun 23-dən 28-nə dək, Kölndəki Meycor (Cologne Major) yarışının bitməsindən dərhal sonra keçirilməsi planlaşdırılır.

Yarışın final mərhələsi Rumıniyanın Buxarest şəhərində yerləşən “Halo Events Center” kompleksində baş tutacaq. İyunun 27-si və 28-də keçiriləcək pley-off matçları canlı azarkeşlərin hüzurunda oynanılacaq.

Oyunlar peşəkar arenadakı yay fasiləsi dövrünə təsadüf etdiyi üçün komandalar çətin seçim qarşısında qalacaqlar. Kollektivlər ya tamdəyərli istirahətə çəkilməli, ya da reytinqdə irəliləmək üçün vacib xallar qazanmaq şansını dəyərləndirməlidirlər.

Xatırladaq ki, aprel ayında keçirilən əvvəlki “DraculaN” turnirinin qalibi “M80” komandası olmuşdu. Həmin vaxt yarışın digər tanınmış iştirakçıları sırasında Meycora vəsiqə qazanmaq üçün vuruşan “FaZe”, həmçinin “Monte” və “Aurora” kollektivləri var idi.